Niroborobo be ny varotra nandritra ny fisokafany lehibe ny Alatsinainy ny lanonana fivarotana Double Eleven, izay hetsika fivarotana an-tserasera sinoa, izay nolazain'ireo manampahaizana manokana fa nampiseho ny faharetan'ny firenena amin'ny fanjifana sy ny fahavitrihana mandritra ny fotoana maharitra eo anivon'ny valan'aretina COVID-19.

Tao anatin'ny ora voalohany tamin'ny Alatsinainy, nihoatra ny tamin'ny andro manontolo tamin'ny taon-dasa ny varotra marika maherin'ny 2.600. Nahita tinady be ireo marika eo an-toerana, anisan'izany ny orinasa mpanao akanjo fanatanjahan-tena Erke sy ny mpanamboatra fiara SAIC-GM-Wuling, nandritra io vanim-potoana io, hoy ny Tmall, sehatra fivarotana an-tserasera an'ny Alibaba Group.

Ny lanonana fivarotana Double Eleven, fantatra ihany koa amin'ny hoe Andro fiantsenana ho an'ny Singles Day, dia fironana natombok'ny sehatra varotra an-tserasera an'i Alibaba tamin'ny 11 Novambra 2009, izay lasa hetsika fivarotana an-tserasera lehibe indrindra eto amin'ny firenena. Matetika izany dia maharitra manomboka ny 1 ka hatramin'ny 11 Novambra mba hisarihana ireo mpikatsaka entana mora vidy.

Nilaza ny goavan'ny varotra an-tserasera JD fa nahalafo vokatra maherin'ny 190 tapitrisa tao anatin'ny efatra ora voalohany tamin'ny lanonana, izay nanomboka tamin'ity taona ity tamin'ny 8 ora alina ny alahady.

Nitombo 200 isan-jato isan-taona ny varotra vokatra Apple tao amin'ny JD tao anatin'ny efatra ora voalohany tamin'ny lanonana, raha toa kosa ka nihoatra ny tamin'ny vanim-potoana mitovy tamin'ny taon-dasa ny varotra vokatra elektronika avy amin'ny Xiaomi, Oppo ary Vivo nandritra ny adiny voalohany, araka ny voalazan'ny JD.

Tsara homarihina fa nitombo 198 isan-jato isan-taona ny fividianan'ireo mpanjifa avy any ivelany tao amin'ny Joybuy, tranonkala an-tserasera manerantany an'ny JD, nandritra io vanim-potoana io, izay nihoatra ny fividianan'izy ireo nandritra ny 1 Novambra manontolo tamin'ny taon-dasa.

"Ny fivezivezen'ny fivarotana tamin'ity taona ity dia naneho ny fitohizan'ny famerenana amin'ny laoniny ny tinady na dia teo aza ny valan'aretina. Ny fitomboana haingana teo amin'ny fivarotana an-tserasera dia naneho ihany koa ny herin'ny firenena amin'ny fanjifana vaovao amin'ny fotoana maharitra," hoy i Fu Yifu, mpikaroka zokiolona ao amin'ny Suning Institute of Finance.

Naminany tao anaty tatitra iray ny orinasa mpanolo-tsaina Bain & Co fa raha ampitahaina tamin'ny taon-dasa, ny isan'ny mpanjifa avy amin'ireo tanàna ambany rihana izay nandray anjara tamin'ny lanonana fivarotana tamin'ity taona ity dia antenaina hihoatra ny an'ireo tanàna voalohany sy faharoa.

Ary koa, hatramin'ny 52 isan-jaton'ny mpanjifa nanaovana fanadihadiana no mikasa ny hampitombo ny fandaniany mandritra ny lanonana fivarotana amin'ity taona ity. Ny salan'isa fandaniana nataon'ny mpanjifa nandritra ny fetibe dia 2.104 yuan ($329) tamin'ny taon-dasa, hoy ny tatitra.

Nomarihin'i Morgan Stanley tao anaty tatitra iray fa ny fanjifana tsy miankina any Shina dia antenaina hitombo avo roa heny ka ho eo amin'ny 13 trillion dolara amin'ny taona 2030, izay hihoatra an'i Etazonia.

"Noho ny hetsika fivarotana goavana toy izany, dia nipoitra ihany koa ny vondron-vokatra izay mahomby amin'ny vidiny, lamaody amin'ny endrika, ary afaka mamaly ny tsiron'ny mpanjifa tanora, izay hitondra ny sehatry ny mpanjifa amin'ny ambaratonga avo kokoa amin'ny fampandrosoana," hoy i Liu Tao, mpikaroka zokiolona avy amin'ny Foibe Fikarohana Fampandrosoana ao amin'ny Filankevi-panjakana.

Nandray anjara tamin'ity tantara ity i He Wei any Shanghai sy i Fan Feifei any Beijing.